...لە چەمچەماڵ سەنتەریک بۆ ئاوارە و پەنابەران کرایەوە

11/9/2016 8:41:24 AM

...لە چەمچەماڵ سەنتەریک بۆ ئاوارە و پەنابەران کرایەوە
رێکخراوی گەشەپێدانی مەدەنیەت CDOبە هاوبەشی لەگەڵ ئاژانسى UNHCR سەنتەری بونیاتنانی تواناکانی ئاوارە و پەنابەرانی لەقەزاى چەمچەماڵ کردەوە و بەرێوەبەری گشتی CDO رایگەیاند بەرداوام دەبن بۆ رەخساندنی هەلومەرجی ژیانی شایستە بۆ پەنابەران و ئاوارە و دانیشتووانی قه‌زای چه‌مچه‌ماڵ.
ئەمڕۆ چوارشەممە 26ی تشرینی یەکەم لە قەزای چەمچەماڵ، بە ئامادەبونی نوێنەری UNHCR و قائیمقامی قەزا و نوێنەرانی ژمارەیەک رێکخراوی تایبەت بە مافی پەنابەران و منالان سەنتەری بونیاتنانی تواناکانی ئاوارە و پەنابەران و دانیشتووانی قه‌زای چه‌مچه‌ماڵ، کرایەوە.
سەرەتای مەراسیمەکە بە دەقیقەیەک وەستان بۆ گیانی قوربانیانی دەستی تیرۆر دەستی پێکرد.
قائیمقامی قەزای چەمچەماڵ ئامانج محمد لە وتەیەکدا لەو مەراسیمەدا سوپاسی هەموو ئەو رێکخراوانەی کرد کە لە بواری کاری مرۆی کار دەکەن و لەکاتی هاتنی بە لێشاوی پەنابەران هاوکاری هەرێمی کوردستان بوون وتی" ئاژانسەکانی یوئین رۆڵی گرنگ و بەرچاویان هەبووە و لە ناوخۆی کوردستانیشدا کارەکانی رێکخراوی CDO جێگەی دەستخۆشین"
لەگەڵ دەسپێکردنی شەڕ لە سوریا و داگیرکردنی بەشێک لە شارەکانی عێراق لە لایەن داعشەوە هەرێمی کوردستان پێشوازی زیاتر لە ملیۆنێک و چوار سەد هەزار پەنابەر و ئاوارە کرد.
رێکخراوی گەشەپێدانی مەدەنییەت CDO بە هاوبەشی لەگەڵ ئۆفیسی هەرێمی رێکخراوی نەتەوە یەکگرتوەکان و حکومەتی هەرێم و رێکخراوە نێودەوڵتییەکانی خەڵکی خۆبەخش و خیرخوازانی هەرێمی کوردستان کاری بە پەلەو جدی کردوە بە ئامانجی رەخساندنی هەلومەرجێکی مرۆیی شیاو بۆ ژیان گوزەرانیان.
سەرۆکی ئەنجومەنی پەنابەرانی رۆژئاڤا حاجی عفرینی سوپاسی رێکخراوى CDO ی کرد داوای کرد کاری زیاتر لە بواری پەروەردە بۆ پەنابەران ئەنجام بدرێت و لەم چوارچێوەدا پێویستی کردنەوەی قوتابخانەیەکی سەرەتایی بۆ مناڵی پەنابەر خستە روو.
هەوەها بەڕێوەبەری خانەی چەمچەماڵ بۆ رۆشنبیری مناڵان ئامادەیی رێکخراوەکەی خستە روو بە مەبەستی سەرخستنی چالاکییەکانی سەنتەری بونیاتنانی تواناکانی ئاوارە و پەنابەرانی لەقەزاکەیاندا.
پاش راگەیاندنی پرۆسە سەربازییەکان بۆ کۆنترۆڵکردنەوەی شاری موێل لە ژێر دەستی داعش، نەتەوە یەکگرتوەکان رایگەیاند پرۆسە سەربازییەکان کاریگەری دەبێت لەسەر ملیۆن ونیوێک خەڵکی مەدەنی لەو ناوچانە، پێدەچێت ملیۆنێک خەڵکی سڤیل ماڵەکانیان جێبهێڵن و لەو ژمارە 700 هەزار مەدەنی پێویستیان بە شوێنی نیشتەجێبونی کاتی دەبێت و لە هەفتەکانی یەکەمی ئەم پرۆسانە لانی کەم 200 هەزار کەس پێویستیان بە هاوکاری مرۆی دەبێت و روو لە شوێنە ئارامەکان دەکەن.
نوێنەری UNHCR سایە تیرۆکا لەو مەراسیمەدا رایگەیاند ئەمە یەکەمین سەنتەر نیە کە بە هاوکاری CDO دەکرێتەوە پێشتریش لە عەربەت و سلێمانی ئەم ناوەندە بۆ خزمەتکردنی ئاوارە پەنابەر کراوەتەوە بەدەوام دەبین لە باشترکردنی باری ژیانیان.
هەروەها لە مەراسیمەکەدا بەڕێوەبەری گشتی CDO بەختیار ئەحمەد رایگەیاند کە CDO بە هەموو توانایەوە هەوڵدەدات خزمەت بە ئاوارەو پەنابەران بکات و لەم چارچێوەیەدا هەر لەسەرەتای دەسپێکردنی شەڕی سوریا و داگیکردنی موێل هەوڵی جدیمان داوە بۆ هاوکاری پەنابەران و رەخساندنی پێداویستی سەرەتایی وتی" لە ئایندەیشدا پلانمان هەیە بۆ هاوکاریکردنی خێزانی قوربانیانی دەستی تیرۆر"


© Copyright 2016, All Rights Reserved

Developed by Avesta Group and powered by Microsoft Azur