#یەکڕیزی_نەک_لێکترازان

10/22/2017 10:35:00 AM

#یەکڕیزی_نەک_لێکترازان
 لە کۆنگرەیەکى ڕۆژنامەوانیدا هەڵمەتى #یەکڕیزی_نەک_لێکترازان رشاگەیەندرا

ڕێکخراوى گەشەپێدانى مەدەنیەت CDO  بە هاوبەشى سەنتەرى میترۆ بۆ داکۆکى لە ڕۆژنامەنوسا و هونەرمەندان ، دەزگاکانى راگەیاندن و، چەند ڕێکخراوێکى  ناوخۆى ، چالاکوانانى کۆمەڵگەى مەدەنى ،رشۆژنامەنوسان و چەند کەسایەتیەک 21ى ئۆکتۆبەر لە هۆڵى کۆنفرانسەکانى CDO لە سلێمانى گفتووگۆیەکى کراوەیان لەسەر بارودۆخى ئێستاى هەرێمى کوردستان ئەنجامدا .
لە پاش گۆڕینەوەى بیر و ڕا هەمووان لەسەر چەند خاڵێک ریککەوتن و لە گۆنگرەیەکى ڕۆژنامەوانیدا بەیاننامەیەکى هاوبەشیان بە دروشمى  یەکڕیزی_نەک_لێکترازان ڕاگەیاند کە ئەمە دەقى بەیاننامەکەیە:

یەکڕیزی_نەک_لێکترازان
لەوساتانەی خەڵکی کوردستان لە خەونی بەدیهێنانی خواست و مافەکانیاندابوون، لەوساتانەی هەموومان بیرمان لە داهاتویەکی گەش و خۆشگوزەرانی و سەقامگیربوونی ئاشتی و ئارامی دەکردەوە، لەوساتانەی کە زۆرینەی هێزەسیاسیەکان جۆرێک لە هاودەنگی و کۆدەنگیان نواند بۆ دیاری کردنی چارەنوسی خەڵکی کوردستان، لەوکاتەدا شەرێکی قورس و نابەرامبەر یەخەی خەڵک و خاکی کوردستانی گرت، بەداخەوە هێزی پێشمەرگەی کوردستان پاش بەخشینی دەیان شەهید و بریندار توشی نسکۆیەک بوو.
نسکۆیەک کەهەرگیز بیرمان لێی نەکردبۆوە، خۆمان بۆی ئامادە نەکردبوو، ئەم نسکۆیە گەرچی بەرامبەر هێزێکی زەبەلاحی پڕچەکی مۆدێرنی دەرەکی بوبێت، کەچی لە لێکەوتەکانیدا خەریکە پریشکی ئاگرەکەی دێتە ناو ماڵی کوردستانیان و دەیەوێت خەرمانی خوێنبەخشینی دەیان ساڵە بسوتێنێت.
واخەریکە دەنگی دەهۆڵەکانی دوبەرەکی بەرز دەبنەوە، واخەریکە بانگەشەی تێکدانی یەکڕیزی دەگاتە گوێمان، ئەمانە تەنها قسەنین بەڵکو راستین و خەریکە رودەدەن، کەرویاندا شەڕی ناوخۆش ماڵی هەموان وێران دەکات.
ئێستا کاتی تۆمەتبارکردنی هیچ کەس و لایەنێک نیە، کاتی باس و خواسی تۆمەتبارکردنی یەکتری نیە، گەر سەرکەوتن رویبدایە خاوەنی زۆر دەبوو، بەڵام کەبووە نسکۆ هەریەک لە خۆی دوردەخاتەوەو دەیخاتە باوەشی ئەویتر.
بۆیە ئەرکی هەموو کوردستانیانە، لەدەرەوە یان ناوەوەی کوردستان کاربکەن بۆ رێگری لەم بانگەشەی دوبەرەکیە، رێگری بکەن لەهەموو وتار و کارێکی ئاراستە کراو بۆ تێکدانی یەکڕیزی، ئەرکی رێکخراوەکانی کۆمەلی مەدەنی و چالاکوانانی مەدەنی و هونەرمەندان و رۆژنامەنوسان و داکۆکی کارانی مافی مرۆڤە کە:
1. لەتۆڕەکانی سۆسیال میدیا چالاکی بنوێنن، پەیامی کورت وکاریگەر دژی تێکدانی یەکڕیزی و بەرەنگاری لێکترازان وشەڕی ناوخۆ بنوسن.
2. چالاکیەکان چڕبکرێنەوە بۆ ئاشتی و دژایەتی وتاری رق و کینە.
3. چالاکی جۆراو جۆر لەکەناڵەکانی میدیا ئەنجامبدرێت و داوای پتەوکردنی یەکڕیزی بکرێت.
4. هونەرمەندان چالاکی هونەری دژ بە پەرتەوازەیی و دوبەرەکی و یەکتر سڕینەوە ئامادەبکەن.
5. رۆژنامەنوسان و میدیاکاران کاربکەن بۆ ئاشتی و پاراستنی رۆحیەتی یەکتر قبوڵکردن و رێزگرتن لە جیاوازیەکان وگەڕان بەدوای خاڵە هاوبەشەکاندا.
6. رێکخراوەکان ئاڕم و لۆگۆ و ئاڵای پاراستنی ئاشتی و ئارامی هەڵبواسن و کار بۆ چەسپاندنی بکەن.
7. گروپی هەمەڕەنگ پێکبهێنرێت و بچنە ناو جەماوەر لە شارو شارۆچکەکان تاوەکو هانیان بدەن رێگری لە دوبەرەکی بکەن.
لەگەڵ ئەمانەشدا داوا لە تەواوی کوردستانیان دەکەین کە پشتیوان و بەشداری ئەم هەوڵە مەدەنی و ئاشتی خوازانەیەمان بن، پەیام ودروشمەکانی ئەم هەڵمەتە بکەن و پەیام و دروشمی خۆیان.
نا بۆ پەرتەوازی..... نا بۆ لێکترازان..... نەفرەت لە شەڕو ئاشوب.....


© Copyright 2016, All Rights Reserved

Developed by Avesta Group and powered by Microsoft Azur